DC awapongeza wauguzi wilayani Kishapu

Mkuu wa Wilaya ya Kishapu, Nyabaganga Talaba akiwa amembeba mtoto aliyezaliwa katika Hopsitali ya Wilaya (Dk. Jakaya Kikwete) wakati wa maadhimisho ya Siku ya Wauguzi Duniani kiwilaya.

Mwandishi Wetu, Kishapu

WAUGUZI wilayani Kishapu wamepongezwa kwa kazi nzuri na kutakiwa kuendelea kuipenda kazi yao kuchapa kazi katika mazingira yoyote waliopo kwani wao ni chachu ya afya katika jamii.

Hayo yamesemwa leo na Mkuu wa Wilaya ya Kishapu mkoani Shinyanga, Nyabaganga Talaba wakati kwenye kilele cha Siku ya Wauguzi Duniani iliyofanyika katika viwanja vya Hospitali ya Wilaya ya DK. Jakaya Kikwete.

Talaba ambaye aliwaongoza wauguzi hao na watumishi wa halmashauri kutoa misaada na kufariji wagonjwa hospitalini hapo aliwapongeza kwa huduma nzuri kwa wagonjwa.

Alisema kuwa bila ya wauguzi afya haijakamilika na kuwa uuguzi ni zaidi ya wito na ni huduma inayohitaji upendo na huruma kwa wale unaowahudumia.

“Kama huna upendo na ukarimu basi wewe siyo muuguzi na ukionesha ukarimu na upendo ndiyo mwanzo wa kupona kwa mgonjwa ukifika tu pale mgonjwa anapona hata kabla hujampa dawa,” alisisitiza.

Aidha, aliwataka wauguzi waendelee kuwa na ushirikiano baina yao huku akiwapongeza kwa mafanikio katika sekta ya afya pamoja na kuwa wana changamoto ya mazingira ya kazi.

Mkuu huyo wa wilaya aliwaomba kuendelea kutimiza wajibu na kuzingatia viapo vyao vya uuguzi na kanuni za utumishi huku akionya kushindwa kufanya hivyo ni kukiuka taratibu za kazi na hivyo kutengeneza migogoro isiyo ya lazima.

Kwa upande wake, Kaimu Muuguzi Mkuu Hospitali ya wilaya hiyo ya Dk. Jakaya Kikwete, Rehema Jumanne akisoma risala alitaja mafanikio yaliyopatikana kuwa ni mafunzo kazini.

Alisema mafunzo hayo yamesaidia wauguzi kuboresha huduma za jamii zikiwemo uzazi wa mpango, huduma za dharura kwa wajawazito na kusaidia wachanga kupumua.

Pia alitaja mafanikio mengine ni kuendeleza wauguzi katika ngazi za juu za elimu na hivyo kutoa huduma kwa kiwango cha juu pamoja na kutoa huduma bora tofauti na mazingira yao.

Hata hivyo alisema kuna changamoto ya uhaba wa watumishi hiyo husababisha kutokuwepo kwa uwiano sawia wa watumishi katika kutoa huduma katika vituo vya afya na zahanati mbalimbali katika wilaya hiyo.

Siku ya Wauguzi Duniani huadhimisha kila Mei 12 ikiwa ni kumuenzi muuguzi mwanzilishi Florance Nightingale aliyoanzisha mwaka 1844 ambapo kaulimbiu ni Wauguzi, mbiu ya kuyafikia malengo endelevu ya millennia.

Kaimu Muuguzi Mkuu Hospitali ya Wilaya, Rehema Jumanne (kulia) akimuongoza Mkuu wa Wilaya, Nyabaganga Talaba na viongozi mbalimbali wa halmashauri na wilaya kutembelea na kufariji wagonjwa katika wodi hospitali ya wilaya.

Mkuu wa Wilaya ya Kishapu mkoani Shinyanga, Nyabaganga Talaba akimpa msaada mmoja wa mama anayeuguza mtoto katika hopsitali ya wilaya.

Mkuu wa Wilaya ya Kishapu, Nyabaganga Talaba akizungumza na wauguzi (hawapo pichani) katika sikukuu ya Wauguzi Duniani viwanja vya hospitali ya wilaya.

Katibu Tawala Wilaya ya Kishapu, Shadrack Kangese akitoa neno kumkaribisha mgeni rasmi mkuu wa wilaya.

Wauguzi wakila kiapo cha utii wakati wa sikukuu hiyo.

Mganga Mfawidhi Hospitali ya Wilaya, Dk. Henry Gong’homa akitoa maelezo kuhusu huduma katika wodi ya wazazi hospitali ya wilaya kwa mgeni rasmi.

Mkuu wa wilaya na mganga mfawidhi wakimfurahia mtoto aliyezaliwa katika wodi ya wazazi.

Wauguzi wakiandamana kuelekea katika wodi mbalimbali kwenda kufariji wagonjwa ikiwa ni mojawapo ya maadhimisho ya siku ya wauguzi duniani kiwilaya yaliyofanyika hospitali ya wilaya.

Kaimu Muuguzi wa wilaya, Susan Kulindwa (kushoto) akiwaongoza wauguzi wenzake (hawapo pichani) kula kiapo cha utii.

Kaimu Muuguzi Mkuu Hospitali ya Wilaya, Rehema Jumanne akisoma risala kwa mgeni rasmi.

Wauguzi wakifuatilia matukio katika kilele cha sikukuu ya wauguzi duniani.

Mgeni rasmi akifurahi zawadi ya shuka alilopewa na wauguzi.

Mkuu wa wilaya akimfariji mama katika hospitali hiyo.

Mwakilishi wa Mkurugenzi Mtendaji Halmashauri ya Wilaya ya Kishapu, Joseph Swalala (kulia), akiwa na mgeni rasmi, Mkuu wa Wilaya, Nyabaganga Talaba na Kaimu Muuguzi wa wilaya, Susan Kulindwa (kushoto)